ठाणे गुन्हे शाखेची मोठी कारवाई! सराईत घरफोडी टोळी जेरबंद; तब्बल ७ गुन्ह्यांची उकल, १७.२७ लाखांचे सोन्याचे दागिने जप्त
ठाणे : ठाणे पोलीस आयुक्तालयाच्या गुन्हे शाखा, घटक-२ (भिवंडी) यांनी घरफोडी करणाऱ्या सराईत गुन्हेगारांविरुद्ध मोठी कारवाई करत तब्बल ७ घरफोडीचे गुन्हे उघडकीस आणले आहेत. या कारवाईत दोन सराईत आरोपींना अटक करण्यात आली असून त्यांच्या ताब्यातून १७ लाख २७ हजार रुपयांचे, सुमारे २९८ ग्रॅम वजनाचे सोन्याचे दागिने जप्त करण्यात आले आहेत. या कारवाईमुळे ठाणे, भिवंडी, बदलापूर आणि वर्तकनगर परिसरातील अनेक घरफोडीच्या गुन्ह्यांचा छडा लागला आहे.
या कारवाईत युसूफ रशीद शेख ऊर्फ दीपक ऊर्फ राहुल (वय ४२, राहणार म्हाडा कॉलनी, वाशी नाका, चेंबूर, मुंबई) आणि नौशाद मुस्ताक आलम ऊर्फ सागर (वय ३२, राहणार प्रकाश चाळ, कामोठे, नवी मुंबई) या दोन सराईत आरोपींना अटक करण्यात आली.
आरोपींकडे सखोल चौकशी केल्यानंतर पोलिसांनी त्यांच्या ताब्यातून २९८ ग्रॅम वजनाचे सोन्याचे दागिने, अंदाजे ₹१७,२७,००० किंमतीचा मुद्देमाल हस्तगत केला. या जप्तीमुळे अनेक घरफोडीच्या गुन्ह्यांतील चोरीचा ऐवज परत मिळवण्यात पोलिसांना यश आले आहे.
या तपासातून खालील सात गुन्ह्यांची उकल करण्यात आली आहे:
नारपोली पोलीस ठाणे गुन्हा क्र. ३५४/२०२६
नारपोली पोलीस ठाणे गुन्हा क्र. २४५/२०२६
भिवंडी शहर पोलीस ठाणे गुन्हा क्र. २३३/२०२६
बदलापूर पश्चिम पोलीस ठाणे गुन्हा क्र. १३७/२०२६
बदलापूर पश्चिम पोलीस ठाणे गुन्हा क्र. ११९/२०२६
बदलापूर पश्चिम पोलीस ठाणे गुन्हा क्र. ११६/२०२६
वर्तकनगर पोलीस ठाणे गुन्हा क्र. २५८/२०२६
या सर्व गुन्ह्यांमध्ये भारतीय न्याय संहितेतील घरफोडी, चोरी व संबंधित कलमांनुसार गुन्हे दाखल आहेत.
तपासादरम्यान धक्कादायक बाब समोर आली की, अटक करण्यात आलेले दोन्ही आरोपी हे सराईत गुन्हेगार असून ठाणे, नवी मुंबई, मुंबई, ठाणे ग्रामीण तसेच मीरा-भाईंदर, वसई-विरार पोलीस आयुक्तालयाच्या हद्दीत मालमत्तेविरुद्धच्या तब्बल ५३ गुन्ह्यांमध्ये त्यांचा सहभाग असल्याची माहिती पोलिसांच्या तपासात उघड झाली आहे. त्यामुळे या टोळीचा गुन्हेगारी इतिहास मोठा असल्याचे स्पष्ट झाले आहे.
या यशस्वी कारवाईमुळे नागरिकांमध्ये सुरक्षिततेची भावना निर्माण झाली असून घरफोडीच्या वाढत्या घटनांवर मोठा आळा बसण्याची अपेक्षा व्यक्त केली जात आहे. चोरीचा मुद्देमाल जप्त करून गुन्ह्यांची उकल करण्यात गुन्हे शाखेने दाखवलेली तत्परता उल्लेखनीय मानली जात आहे.
ही संपूर्ण कारवाई पोलीस सहआयुक्त (गुन्हे) पंजाबराव उगले, पोलीस उपआयुक्त (गुन्हे) अमरसिंग जाधव आणि सहाय्यक पोलीस आयुक्त (गुन्हे शोध-१) शेखर बागडे यांच्या मार्गदर्शनाखाली पार पडली. गुन्हे शाखा, घटक-२, भिवंडीचे वरिष्ठ पोलीस निरीक्षक शीतल राऊत यांच्या नेतृत्वाखाली अधिकारी व अंमलदारांच्या पथकाने ही उल्लेखनीय कामगिरी केली.
ठाणे गुन्हे शाखेच्या या कारवाईमुळे सराईत घरफोडी टोळीचा पर्दाफाश झाला असून, अजून काही गुन्ह्यांचा उलगडा होण्याची शक्यता पोलिसांनी व्यक्त केली आहे. नागरिकांनी संशयास्पद हालचाली दिसल्यास तात्काळ स्थानिक पोलिसांना माहिती देण्याचे आवाहन करण्यात आले आहे.
