मुंबई, दि. २ जून २०२६ : मुंबईतील साकीनाका पोलिसांच्या अमली पदार्थविरोधी पथकाने गुजरात राज्यातील नर्मदा जिल्ह्यात मोठी कारवाई करत मेफेड्रोन (एमडी) या अमली पदार्थाच्या निर्मितीचा कारखाना उद्ध्वस्त केला आहे. या कारवाईत तब्बल २०.१४१ किलो द्रवरूप एमडी, मोठ्या प्रमाणात रासायनिक पदार्थ, उत्पादनासाठी वापरले जाणारे साहित्य आणि यंत्रसामग्री जप्त करण्यात आली असून जप्त मुद्देमालाची एकूण किंमत सुमारे ७४ कोटी ९७ लाख रुपये इतकी आहे.
या प्रकरणात साकीनाका पोलीस ठाण्यात गुन्हा क्रमांक ५३४/२०२५ अन्वये एनडीपीएस कायदा १९८५ मधील विविध कलमांखाली गुन्हा दाखल करण्यात आला आहे. या गुन्ह्याच्या तपासादरम्यान दोन आरोपींना अटक करण्यात आली आहे.
पोलिसांनी दिलेल्या माहितीनुसार, २१ मे २०२६ रोजी सायंकाळी अंधेरी-घाटकोपर लिंक रोडवरील पेनिन्सुला हॉटेलसमोर साकीनाका पोलिसांनी सापळा रचून मुस्कान समीर खान (वय २६) हिला ताब्यात घेतले होते. तिच्याकडून विक्रीसाठी आणलेले १०१ ग्रॅम मेफेड्रोन (एमडी) जप्त करण्यात आले होते. त्यानंतर तिच्याविरोधात साकीनाका पोलीस ठाण्यात गुन्हा दाखल करण्यात आला.
तपासादरम्यान आरोपी महिलेची कसून चौकशी करण्यात आली. या चौकशीत तिने जप्त करण्यात आलेले मेफेड्रोन हे वजुल कमर अब्दुल वफा चौधरी उर्फ पप्पू (वय ५६) याच्याकडून खरेदी केल्याची माहिती दिली. त्यानुसार साकीनाका पोलिसांच्या अमली पदार्थविरोधी पथकाने २६ मे रोजी संबंधित आरोपीला शिळफाटा परिसरातून ताब्यात घेतले.
पुढील चौकशीत आरोपीने धक्कादायक माहिती उघड केली. गुजरात राज्यातील नर्मदा जिल्ह्यातील राजपीपळा तालुक्यातील मु. वरखड येथे एका ओळखीच्या व्यक्तीचे घर भाड्याने घेऊन त्यामध्ये मेफेड्रोन तयार करण्याचा कारखाना सुरू असल्याचे त्याने कबूल केले. या माहितीच्या आधारे साकीनाका पोलिसांनी गुजरातमध्ये विशेष पथक पाठवून छापा टाकला.
छाप्यामध्ये पोलिसांना अमली पदार्थ निर्मितीसाठी उभारलेला संपूर्ण कारखाना आढळून आला. या कारवाईत सुमारे २०.०४० किलो द्रवरूप मेफेड्रोन (लिक्विड एमडी) जप्त करण्यात आले. आंतरराष्ट्रीय बाजारमूल्यानुसार या अमली पदार्थाची किंमत तब्बल ७४ कोटी ४६ लाख रुपये इतकी असल्याचे पोलिसांनी सांगितले.
याशिवाय एमडी तयार करण्यासाठी वापरण्यात येणारी विविध रसायने आणि उपकरणेही जप्त करण्यात आली. त्यामध्ये २६ किलो २-ब्रोमो-४-मिथाइलअनिलीन हे रसायन, ५० लिटर ४-मिथाइलप्रोपिओफेनोन, २० लिटर मोनोमिथाइलअमाइन, १३.५० लिटर ब्रोमीन आणि ३५ लिटर क्लोरोफॉर्म यांचा समावेश आहे. या रसायनांची एकूण किंमत लाखो रुपयांच्या घरात आहे.
कारखान्यात वापरली जाणारी यंत्रसामग्रीदेखील पोलिसांनी जप्त केली आहे. त्यामध्ये तीन स्टिरर मशीन, टाटा व्होल्टास कंपनीचे दोन कमर्शियल फ्रिज, पाच गोलाकार फ्लास्क आणि एक हीटिंग मेटल यांचा समावेश आहे. ही सर्व उपकरणे एमडी निर्मितीसाठी वापरली जात असल्याचे तपासात समोर आले आहे.
या कारवाईत जप्त करण्यात आलेल्या अमली पदार्थ, रसायने, उत्पादन साहित्य आणि इतर मुद्देमालाची एकूण किंमत ७४ कोटी ७६ लाख रुपये इतकी आहे. यापूर्वी जप्त करण्यात आलेल्या १०१ ग्रॅम मेफेड्रोनसह एकूण जप्तीची किंमत ७४ कोटी ९७ लाख रुपये इतकी झाली आहे.
ही कारवाई मुंबई पोलीस आयुक्तांच्या मार्गदर्शनाखाली करण्यात आली. साकीनाका विभागाचे वरिष्ठ अधिकारी, अमली पदार्थविरोधी पथकाचे अधिकारी आणि तपास पथकाने संयुक्तपणे ही मोहीम राबवली. या कारवाईमुळे मुंबईसह गुजरातमध्ये कार्यरत असलेल्या अमली पदार्थांच्या आंतरराज्यीय रॅकेटला मोठा धक्का बसल्याचे मानले जात आहे.
साकीनाका पोलिसांकडून या प्रकरणाचा अधिक तपास सुरू असून या रॅकेटमध्ये आणखी कोणाचा सहभाग आहे का, याचा शोध घेतला जात आहे. तसेच जप्त करण्यात आलेला अमली पदार्थ देशातील कोणत्या भागात पुरवठा केला जाणार होता, याचाही तपास सुरू आहे. पोलिसांच्या या कारवाईमुळे मोठ्या प्रमाणावर अमली पदार्थ बाजारात पोहोचण्यापूर्वीच जप्त करण्यात यश आले असून अमली पदार्थविरोधी लढ्यात ही महत्त्वपूर्ण कामगिरी मानली जात आहे.
